Azərbaycan, Bakı, 14 noyabr /Trend, müxbir A.Axundov/
Bazar ertəsi Dünya Bankının (DB) büdcə və korporativ sektorlarda hesabatlılıq üzrə layihəsinin (CAP/SAP) üçüncü mərhələsi başlayıb. Bu layihə Azərbaycan Hesablama Palatasının işinin təkmilləşdirilməsinə yönəlib. Bu barədə bazar ertəsi Trend-ə Palata sədrinin müavini Adil Məhərrəmov deyib.
"Birinci və ikinci mərhələnin yekunu olaraq, məsləhətçi qismində cəlb edilən almaniyalı mütəxəssis Aksel Menniken artıq hesabat hazırlayıb və bizə təqdim edib. O, yekun və əsas mərhələ çərçivəsində qanunvericiliyin dəyişdirilməsi və yekun hesabat üzrə təkliflər hazırlayacaq", - Məhərrəmov bildirib.
Onun sözlərinə görə, üçüncü mərhələ iki həftə davam edəcək.
Layihənin ümumi dəyəri 24 milyon dollardır. Layihə DB-nin 11 milyon dollarlıq krediti, Yaponiyanın PHRD (3 milyon dollar) fondunun, SECO-nun (2 milyon dollar) qrantları və Azərbaycan hökumətinin payı (8 milyon dollar) hesabına maliyyələşdirilir.
CAP/SAP layihəsi DB-nin İcraedici Şurası tərəfindən 2008-ci il martın 27-də qəbul edilib. 2011-ci ilin sentyabrına olan vəziyyətə görə, DB-nin verdiyi kredit vəsaitlərinin ümumi həcmindən 0,4 milyon dollar xərclənib, qalıq isə 10,8 milyon dollar təşkil edir.
