Azərbaycan, Bakı, 5 dekabr /Trend, müxbir A.Axundov/
Azərbaycanda fəaliyyət göstərən tikinti şirkətlərinin əksəriyyəti tikilən binalarda mənzillərin dövlət ipoteka proqramı ilə satışında maraqlı deyillər. Trend-in məlumatına görə, bu barədə bazar ertəsi əmlak məsələləri üzrə ekspert Pərviz Rəhimoğlunun "Əmlak Bazarı İştirakçıları" İctimai Birliyinin nəşr etdiyi "Daşınmaz Əmlak" jurnalında dərc edilən məqaləsində deyilir.
"Nisbətən ucuz qiymətə - 450-600 manata mənzil satan şirkətlərin satışla bağlı ciddi problemləri olmur. Digər tərəfdən, ipoteka krediti üzrə müraciətə baxılması prosesinin müəyyən vaxt apardığı və sonda nəticənin müsbət olacağı dəqiq bilinmədiyi üçün tikinti şirkəti alıcı ilə belə şərtlərlə razılaşmaqda maraqlı olmur", - ekspert hesab edir.
Onun sözlərinə görə, başqa bir məsələ onunla bağlıdır ki, tikinti şirkəti satışdan sonra da onun idarəçiliyində olan binanın mənzilinin müəyyən problemlərin yaranmaması üçün bankda girovda olmasını istəmir.
"Gəliri 2000 manatdan yuxarı olan ailələrin tikinti şirkətlərinin təqdim etdiyi qısamüddətli kreditlərdən yararlanaraq mənzili birbaşa onların özlərindən alırlar. Bu zaman ilkin və aylıq ödənişin məbləği dövlət ipotekasından çox olsa da, ümumi məbləğdə çox az miqdarda əlavə xərc yaranır. Üstəlik, ailənin gəlirinin kifayət qədər olmasını tikinti şirkətinə şifahi şəkildə inandırmaq bəs edir", - Rəhimoğlu deyib.
Onun sözlərinə görə, məhz bunun nəticəsində son illər kreditlə mənzil satan tikinti şirkətlərinin sayı artır.
Birliyin məlumatına görə, Azərbaycanda 152 tikinti şirkəti fəaliyyət göstərir.
