Azərbaycan, Bakı, 13 dekabr /Trend, müxbir A.Axundov/
Azərbaycanın sığorta şirkəti "Standard Insurance" 2012-ci ildə 50-70 faiz sığorta mükafatları artımını gözləyir. Bu barədə çərşənbə axşamı Trend-ə şirkətin idarə heyətinin sədr müavini Aydın Rəhmanov deyib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına əsasən, "Standard Insurance" şirkəti 2011-ci ilin yanvar-oktyabrında 8,44 milyon manat dəyərində mükafat yığıb, 2,07 milyon həcmində isə dəymiş zərəri ödəyib. 2010-ci ildə yığımlar 8,62 milyon manat, ödənişlər isə 2,22 milyon manat təşkil edib.
Cari ilin sonuna qədər şirkət 12 milyon manat yığmağı planlaşdırır.
Rəhmanovun sözlərinə görə, şirkətin inkişaf strategiyası gələn il dəyişməyəcək.
"2012-ci ildə şirkət riteyl inkişafını davam etdirmək niyyətindədir. Biz bunu agentliklər və nümayəndəliklər vasitəsilə edəcəyik", - Rəhmanov bildirib.
Onun sözlərinə görə, 2012-ci ildə şirkətin biznes həcminin artımı icbari sığorta növlərində öz rolunu oynayacaq. Həmçinin, inkişaf əmlak sığortası, avtomobil və tibbi sığortalar istiqamətində planlaşdırılır.
"Yeni məhsullar, əsasən, avtomobil və əmlak sığortaları istiqamətində hazırlanacaq", - Rəhmanov qeyd edib.
Azərbaycanın ən iri sığorta şirkətlərindən biri olan "Standard Insurance" 2002-ci ildən bazarda fəaliyyət göstərir. Şirkət 28 sığorta növü üzrə xidmətlər göstərir.
Dekabrın 13-nə olan rəsmi məzənnə 0,7864 AZN/USD təşkil edir.
