Azərbaycan, Bakı, 12 yanvar /Trend, müxbir N.İsmayılova/
Masallı-Astara avtomobil yolu layihəsinin qiymətləndirilməsi üçün yanvarın 17-dən 27-dək Asiya İnkişaf Bankının nəqliyyat mütəxəssisi Reddi Bathula Balabhaskarın başçılıq etdiyi missiya Bakıda olacaq. Bu barədə Trend-ə cümə axşamı AİB-in Bakı nümayəndəliyindən bildiriblər.
2011-ci ilin sonlarında Asiya İnkişaf Bankının (AİB) menecmenti Azərbaycandakı yol layihələri üçün (Road Network Development Program) multitranş paketi (Multitranche Financing Facility - MFF) çərçivəsində üçüncü kreditin verilməsini təqdir edib. Üçüncü tranş 200 milyon dollar məbləğində təsdiqlənib. Bu vəsait Masallı-Astara dördzolaqlı sürət magistralının tikintisinin davam etdirilməsinə yönəldiləcək.
"İcmal xarakteri daşıyan missiyanın əsas məqsədi bu layihənin həyata keçirilməsinə hazırlıq, eləcə də podratçının seçimi ilə bağlı məsələlərin həlli olacaq", - bankdan deyiblər.
AİB 2007-ci ilin avqustunda imzalanmış 500 milyon dollar multitranş paketdən avtomobil yollarının tikintisinə artıq 455,4 milyon dollar ayrılıb.
200 milyon dollar həcmində birinci tranş Masallı-Astara avtomobil yolunun tikintisi, ikinci isə (55,4 milyon dollar) Gəncə dairəvi yolunun yenidən qurulması üçün ayrılıb.
Uzunluğu 22,15 kilometr olan birinci hissənin tikintisi üçün "Azərinşaatservis" tikinti şirkəti seçilib. Digər iki hissə (B və С) üzrə isə tender proseduru davam edir.
Azərbaycan 1999-cu ildən AİB-in üzvüdür. AİB-in ölkə üzrə kredit portfeli təxminən 700 milyon dollar təşkil edir.
AİB 1966-cı ildə üzv dövlətlər tərəfindən Asiya İnkişaf Bankının yaradılması haqqında sazişə uyğun olaraq təsis edilib. 2010-cu il dekabrın 31-nə olan məlumata görə, AİB-in 67 üzvü var ki, bunlardan 48-i Asiya və Sakit Okean hövzəsində yerləşir.
AİB-in baş ofisi Filippinin paytaxtı Manilada yerləşir və dünyanın müxtəlif yerlərində, o cümlədən Şimali Amerika (Vaşinqton DC), Avropa (Frankfurt) və Yaponiyada (Tokio) ofisləri var.
