Azərbaycan, Bakı, 13 yanvar /Trend, müxbir N.İsmayılova/
Balaxanı Sənaye Parkında məişət tullantılarının təkrar emalında maraqlı olan müəssisələrin fəaliyyəti üçün xüsusi güzəştli şərtlər yaradılacaq. Trend-in məlumatına görə, bu barədə cümə günü jurnalistlərə "Təmiz Şəhər" ASC-nin idarə heyətinin sədri Zakir İbrahimov bildirib.
Azərbaycan Prezidenti İlham Əliyev 2011-ci il dekabrın 28-də Balaxanı Sənaye Parkının yaradılması haqqında sərəncam imzalayıb.
"Hazırda məsləhətçilərin cəlb edilməsi ilə birlikdə sənaye parkının yaradılması üzrə institusional və hazırlıq işləri aparılır. Yaradılan sənaye parkında məişət tullantılarının təkrar emalı prosesinə cəlb olunmaq istəyən həm yerli, həm də xarici şirkətlər iştirak edə bilərlər", - İbrahimov deyib.
Onun sözlərinə görə, dövlət tərəfindən güzəştli şərtlər təmin ediləcək və fəaliyyət üçün xüsusi vergi və gömrük rejimi tətbiq olunacaq. Bununla əlaqədar, hazırda müzakirələr aparılır.
"Balaxanı poliqonu ərazisində tikilən illik gücü 200 min ton olan məişət tullantılarının çeşidlənməsi üzrə avtomatik məntəqə çeşidlənən tullantıları sənaye parkına tədarük edəcək", - İbrahimov qeyd edib.
Balaxanı Sənaye Parkının idarə olunması "Təmiz Şəhər" ASC-yə tapşırılıb. Parkın tikintisi üçün ARDNŞ-nin (Azərbaycan Respublikası Dövlət Neft Şirkəti) "Balaxanıneft" Neftqazçıxarma İdarəsinin ərazisindən 7 hektar torpaq sahəsi ayrılıb.
Balaxanı Sənaye Parkının fəaliyyətinin təşkilini, torpağın istifadəyə yararlı vəziyyətə gətirilməsini, xarici və daxili infrastrukturun (elektrik və istilik enerjisi, qaz, su, kanalizasiya, rabitə, nəqliyyat, yanğından mühafizə, istehsal təyinatlı, inzibati, sosial və digər infrastruktur obyektləri) yaradılmasını, ofis, konsaltinq, laborator müayinə və sahibkarlıq fəaliyyətinin səmərəli həyata keçirilməsi üçün digər xidmətlərin göstərilməsini təmin etmək məqsədi ilə Azərbaycan Respublikasının 2011-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan iki milyon manat ayrılıb.
Yanvarın 13-nə olan rəsmi məzənnə 0,7864 AZN/USD təşkil edir.
