Azərbaycan, Bakı, 14 yanvar /Trend, müxbir N.İsmayılova/
Azərbaycan Əmanətlərin Sığortalanması Fondu (ADIF) ödənişlərin həyata keçirilməsi müddətini azaltmağa imkan verən proqram təminatının yaradılması üzrə tenderin qalibini martda elan edəcək. Bu barədə Trend-ə fondun icraçı direktoru Azad Cavadov məlumat verib.
"2011-ci ildə ADIF bankların müflisləşməsi zamanı əhalinin sığortalanmış əmanətlərinin qaytarılması müddətinin qısaldılması məqsədilə proqram təminatının yaradılması üzrə tender elan edib. Bu günədək fonda artıq üç tender təklifi daxil olub, onların qiymətləndirilməsi fevralda baş tutacaq", - Cavadov deyib.
Azərbaycanda qüvvədə olan qanunvericiliyə uyğun olaraq, bu gün ödənişin həyata keçirilməsi müddəti əmanətçinin banka və ya fonda müraciət etdiyi gündən etibarən 90 gün təşkil edir. ADIF-in başlıca məqsədi bu müddəti 14 günə endirməkdir.
Tender proseduru 2012-ci il fevralın 3-də keçiriləcək.
Fondun informasiya sisteminə aşağıdakı modul və interfeyslər daxil olmalıdır: əməliyyat sistemi modulu (inzibatçı və istifadəçilərin modulu daxil olmaqla), hesabatlılığın yaradılması üzrə modul, üzv banklarda proqram təminatı işləri üzrə modul, müvəkkil banklarda proqram təminatı işləri üzrə modul.
ADIF 2007-ci il avqustun 13-də fəaliyyətə başlayıb. Hazırda ölkədə fəaliyyət göstərən 44 bankdan 43-ü fondun üzvüdür. Bir bank isə Mərkəzi Bankın tələblərinə cavab vermədiyi üçün məhdud lisenziya ilə fəaliyyət göstərir və əmanətlərin qəbulunu apara bilmir. Fondun fəaliyyət göstərdiyi dövrdə Azərbaycanda bank müflisləşməsi ilə bağlı hal qeydə alınmayıb və buna uyğun olaraq, ADİF-dən ödənişlər də həyata keçirilmir.