Azərbaycan, Bakı, 24 yanvar /Trend, müxbir N.İsmayılova/
Avropa Yenidənqurma və İnkişaf Bankı (AYİB) 2012-ci ildə Azərbaycanın ümumi daxili məhsulunun (ÜDM) artımını 3,5 faiz səviyyəsində proqnozlaşdırır. Trend-in məlumatına görə, bu barədə çərşənbə axşamı AYİB-in saytında dərc edilən regionda iqtisadi inkişaf perspektivləri üzrə bankın əməliyyatlarının yanvar ayı üzrə hesabatında deyilir.
"Ölkə iqtisadiyyatının diversifikasiyası hələ də önəmlidir, çünki iqtisadiyyatın neftdən yüksək asıllığı ilə bağlı risklər dünya böhranı zamanı neftin qiyməti ucuzlaşanda aydın oldu", - bankın hesabatında qeyd edilir.
Azərbaycan iqtisadi inkişaf tempi üzrə, AYİB-in proqnozlarına uyğun olaraq Belarusu qabaqlayır. Belarusda ÜDM-in artım tempi 1,5 faiz, Ukraynada 2,5 faiz səviyyəsində proqnozlaşdırılır. Moldovada artım tempi (3,5 faiz) Azərbaycanla eynidir.
Azərbaycan hökumətinin proqnozlarına əsasən, 2012-ci il üçün sosial-iqtisadi inkişaf konsepsiyası layihəsi çərçivəsində ÜDM-in real artım tempi 5,7 faiz, qeyri-neft ÜDM-nin artım tempi 8,6 faiz, neft ÜDM-nin artım tempi isə 1,5 faiz səviyyəsində proqnozlaşdırılır. İnflyasiyanın səviyyəsinin 6 faiz olacağı gözlənilir. Ölkənin ÜDM-i bu il üçün bir ABŞ dollarına görə 0,79 manat məzənnə nəzərə alınmaqla 55,1 milyard dollar həcmində proqnozlaşdırılır.
Dünya Bankı 2012-ci ildə Azərbaycanda ÜDM-in artım tempini 3,1 faiz, Beynəlxalq Valyuta Fondu 3,7 faiz, Asiya İnkişaf Bankı isə 4,5 faiz səviyyəsində proqnozlaşdırır.
