Azərbaycan, Bakı, 25 yanvar /Trend, müxbir A.Axundov/
2012-ci ildə Azərbaycanın dövlət büdcəsinə gömrük ödənişləri 1994-cü illə müqayisədə təqribən 345 dəfə artıb. Trend-in məlumatına görə, bu barədə Dövlət Gömrük Komitəsi sədrinini birinci müavini Səfər Mehdiyevin çərşənbə günü rəsmi mətbuatda dərc olunmuş məqaləsində deyilir.
"1993-2011-ci illərdə dövlət büdcəsinə gömrük ödənişlərinin səviyyəsində, onların büdcə gəlirlərində xüsusi çəkisində illik artım nümayiş olunub. Əgər 1994-cü ildə dövlət büdcəsinə gömrük rüsumlarından və vergilərdən 3,48 milyon manat vəsait daxil olubsa, 2012-ci ildə bu göstərici 1,2 milyard manat səviyyəsində proqnozlaşdırlır", - məqalədə qeyd olunur.
DGK 2011-ci il üzrə ödəniş proqnozunu yerinə yetirib. Ötən ilin dekabrında DGK dövlət büdcəsinə toplanmış gömrük rüsumları və vergilər hesabına 108,13 milyon manat vəsait köçürüb. Beləliklə, 2011-ci ildə DGK xətti ilə dövlət büdcəsinə 1,14 milyard manat vəsait köçürülüb ki, bu da proqnoza uyğundur.
Ötən ilin dekabrında gömrük rüsumlarından daxilolmalar 33,117 milyon manat, idxal olunan mallara əlavə dəyər vergisi - 67,23 milyon manat, aksizlər - 6,83 milyon manat, yol vergisi - 0,95 milyon manat olub.
2010-cu ildə DGK proqnoza 100,16 faiz əməl edərək dövlət büdcəsinə planlaşdırılan 1,1 milyard manata nisbətdə 1 101,73 milyon manat vəsait köçürüb.
Yanvarın 25-nə olan rəsmi məzənnə 0,7863 AZN/USD təşkil edir.
