Azərbaycan, Bakı, 4 fevral / Trend, müxbir İ.Xəlilova /
Beynəlxalq valyuta bazarındakı hazırkı vəziyyət avronun Azərbaycan valyutasına nisbətdə məzənnəsinin tədricən bahalaşmasına gətirib çıxarıb və bu həftə 2012-ci ilin əvvəlinə ən yüksək, yəni bir avroya görə 1,0372 manat məzənnə qeydə alınıb.
Lakin həfətsonu Azərbaycan valyutasına nisbətdə avronun məzənnəsi yenidən düşərək cümə günü bir avroya görə 1,0325 manat təşkil edib. On il ərzində ən aşağı göstərici 16 yanvar 2012-ci ildə qeydə alınıb - bir avroya görə 0,9943 manat. Bu vəziyyət onunla izah olunur ki, 2012-ci ildə dünya maliyyə bazarlarında Avropa valyutasının məzənnəsi nəzərəçarpacaq dərəcədə aşağı düşməyə başlayıb. Son 16 ayda avronun dollara nisbətdə məzənnəsi ən aşağı həddə, yapon iyeninə nisbətdə isə hətta son 11 ildə minimuma enib.
Azərbaycan Mərkəzi Bankından (AMB) Trend-ə deyildiyi kimi, MB ölkədəki inflyasiya proseslərindən asılı olaraq manatın ABŞ dollarına nəzərən ikitərəfli məzənnəsini tənzimləyir. Avronun məzənnəsi isə çarpaz məzənnə ilə hesablanır. Bu baxımdan manatın Avropa valyutasına nisbətdə məzənnəsi beynəlxalq valyuta bazarındakı proseslərdən asılı olaraq dəyişir.
"Son illər beynəlxalq valyuta bazarındakı prosesləri, xüsusən də Avrozonadakı iqtisadi prossesləri nəzərə alaraq, manatın avroya nəzərən məzənnəsini təxmini də olsa proqnozlaşdırmaq praktiki olaraq mümkün deyil", - AMB-dan deyiblər.
Azərbaycan hökumətinin proqnozlarına görə, 2012-ci ildə manatın avroya nisbətdə məzənnəsi 2011-ci ildəki bir avro üçün 1,0939 manata qarşı (AMB-nin məlumatına görə, ilin sonuna məzənnə 1,0178 manat təşkil edib) 1,0910 manat səviyyəsində gözlənilir. 2013-cü il üçün məzənnə 1,0608 manat, 2014-cü ildə 1,0430 manat, 2015-ci ildə isə 1,0387 manat səviyyəsində proqnozlaşdırılır.
"Azərbaycan hökuməti 2012-ci ildə ilk dəfə olaraq milli valyutanın avroya nisbətdə orta illik məzənnəsini ölkənin sosial-iqtisadi inkişaf konsepsiyasına daxil edib. Adətən büdcə paketində manatın dollara nisbətdə məzənnəsində orta illik dəyişikliyin proqnozu fiksə olunur, Avropa valyutasına münasibətdə isə proqnozlar formal əsasda tərtib edilir", - ölkə hökumətindən bildirilib.
2015-ci ilədək milli valyutanın dollara nisbətdə orta illik məzənnəsinin proqnozu dəyişməz saxlanılıb, yəni 2011-ci ildəki kimi 0,79 manat səviyyəsində.
Göründüyü kimi, ölkə hökuməti dolların məzənnə proqnozlarında sabitliyi qoruyub saxlayır, avroya münasibətdə isə manatın məzənnəsinin tədricən möhkəmlənəcəyini proqnozlaşdırır.
