Azərbaycan, Bakı, 11 fevral /Trend, müxbir N.İsmayılova/
Azərbaycan Mərkəzi Bankının (AMB) məlumatına görə, ölkədə 2011-ci ilin dördüncü rübündə xarici kapitalın iştirakı ilə bankların sayı artıb.
Hazırda ölkədə xarici kapitalın iştirakı ilə 23 bank fəaliyyət göstərir. 2011-ci ilin üçüncü rübünün yekunları üzrə bu rəqəm 22 bank olub. Onların yeddisində xarici kapitalın xüsusi çəkisi 50-100 faiz arasında dəyişir, 14-də isə 50 faiz təşkil edir. Bundan başqa, xarici bankların iki yerli filialı fəaliyyət göstərir. Trend-in məlumatına görə, bu barədə şənbə günü AMB-nin məlumatında deyilir.
Hesabat dövrü ərzində respublika ərazisində bank fəaliyyəti göstərmək üçün 44 bankın lisenziyası olub.
Xaricdə fəaliyyət göstərən bank strukturlarının sayı 9-dur, onlardan altısı nüməyəndəlik, ikisi bankın törəmə strukturu, biri isə filialdır. Azərbaycanda, həmçinin, xarici bankların 5 nümayəndəliyi fəaliyyət göstərir.
2011-ci ilin sonuna olan məlumata əsasən, ölkədə bankların 666 yerli filialı fəaliyyət göstərib, onlardan 37-si Azərbaycan Beynəlxalq Bankının, 629-u isə özəl bankların filiallarıdır. İlin əvvəlindən yerli filialların sayı 22 ədəd (3,4 faiz) artıb.
İlin əvvəlindən 41 ədəd (34,2 faiz) artan bank şöbələrinin sayı 161 ədədə çatıb.
Ötən ilin dördüncü rübünün nəticələrinə görə, ölkədə beş bank ləğvetmə prosesindədir. 2008-ci ilin iyulunda AMB "Atlantbank" və "Poçtbank"ın bank fəaliyyəti göstərməsinə görə verilən lisenziyaların geri çağırılması haqqında qərar qəbul edib. Buna səbəb bankların məcmu kapitalın tələblərini yerinə yetirməməsi, eləcə də idarəetmə və mövcud əməliyyatların həyata keçirilməsi zamanı prudensial qaydalara riayət etməməsi olub.
2010-cu ilin dekabrında "Debutbank" və "Kövsərbank"ın lisenziyaları ləğv edilib. Bu qərar minimum məcmu kapitalın tələblərinin yerinə yetirilməməsi, bank qanunvericiliyi tələblərinin pozulması, eləcə də idarəetmənin və cari fəaliyyətin etibarlı və prudensial qaydada yerinə yetirilməməsi ilə izah edilir.
2011-ci ilin yanvarında AMB-nin idarə heyətinin qərarı ilə "Birlikbank"a fəaliyyət göstərməsi üçün verilən lisenziya ləğv edilib.
