Azərbaycan, Bakı, 24 mart /Trend, müxbir S.Əliyev/
Gürcüstandan Azərbaycana gələn yük qatarının relsdən çıxması nəticəsində qatarların hərəkətində yaranan məhdudiyyətlər qismən aradan qaldırılıb. Bu barədə şənbə günü Trend-ə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
Onun sözlərinə görə, hazırda qatarların hərəkəti bir yolla nizamlanır, Bakıya gələn istiqamətdə ikinci yolun bərpası davam etdirilir.
"Azərbaycan Dəmir Yolları" QSC-nin Kürəkçay-Goran mənzilinin 216-cı kilometrliyində Gürcüstandan Səngəçala gələn yük qatarının üç boş vaqonu relsdən çıxıb.
Martın 23-də axşam saatlarında baş vermiş hadisə nəticəsində sərnişin və yük qatarının hərəkətində qismən fasilələr yaranıb. Saat 05:30-da Bakıdan gedən qatarların hərəkəti bərpa olunub.
Hazırda hadisənin səbəbləri araşdırılır.