Azərbaycan, Bakı, 9 aprel /Trend, müxbir A.Axundov/
Azərbaycanda planlaşdırılmış şəhərsalma işlərinin aparılması zamanı ictimai rəy nəzərə alınacaq. Bu barədə bazar ertəsi Trend-ə Dövlət Şəhərsalma və Arxitektura Komitəsinin sədr müavini Dövlətxan Dövlətxanov bildirib.
"Parlamentdə yeni şəhərsalma məcəlləsi nəzərdən keçirilir. Məcəllədə ictimaiyyəti necə və hansı formada məlumatlandırmağın lazım olduğu dəqiq yazılıb. Məcəllədə ictimaiyyətin planlaşdırma işlərilə tanış olmasının bütün proseduru, habelə bu işlərin keçirilməsi zamanı ictimai rəyin nəzərə alınması qanuni şəkildə möhkəmlənəcək", - Dövlətxanov qeyd edib.
Onun sözlərinə görə, bu, qərb standartlarına cavab verən yaxşı prosedurdur.
"Bundan sonra bütün sənədlər açılacaq və dedi-qodunun yaranmasına bəhanə olmayacaq. Biz artıq "Böyük Bakının regional inkişaf planı" üçün ayrıca sayt açmışıq və hazırda digər işlərimizə münasibətdə də oxşar istiqamətdə işləyirik. Bunun üçün müvafiq qanunvericilik bazasının olmaması nəzərə alınmaqla hər şey pilot lahihələr səviyyəsində edilir", - Dövlətxanov deyib.
