Azərbaycan, Bakı, 23 aprel / Trend, müxbir A.Axundov /
Azərbaycan Dövlət Şəhərsalma və Arxitektura Komitəsi 2012-ci ilin I rübündə üç hüquqi və bir fiziki şəxsə binaların və qurğuların layihələndirilməsinə dair fəaliyyət üzrə xüsusi icazə (lisenziya) verib. Trend-in məlumatına görə, bu barədə Komitənin dünən yaydığı məlumatda deyilir.
I rübdə Bakıda şəhərsalma fəaliyyəti öyrənilib. Baxış keçirilən zaman şəhərsalma qanunvericiliyinin tələblərinin pozulması ilə tikilən 17 ədəd obyekt aşkarlanıb.
Habelə bu dövrdə 7 ədəd milli normativ sənədin tərtibatı başa çatdırılıb və yaxın vaxtlarda təsdiqi və qeydiyyata alınması nəzərdə tutulur. 17 ədəd yeni normativ sənəd isə 1-ci redaksiyada hazırlanıb.
"Tikintidə standartlaşdırma, texniki normalaşdırma və uyğunluğun qiymətləndirilməsi üzrə Dövlətlərarası Elmi-Texniki Komissiya (TNDETK) tərəfindən təqdim edilmiş 9 ədəd dövlətlərarası standarta baxılaraq rəy bildirilib", - məlumatda deyilir.