Azərbaycan, Bakı, 24 aprel /Trend, müxbir A.Axundov/
Asiya İnkişaf Bankı (AİB) və Azərbaycan hökuməti Azərbaycanda yol şəbəkəsinin inkişafı üzrə bankın ikinci multitranş paketi (Multitranche Financing Facility - MFF) çərçivəsində keçiriləcək işləri müzakirə edəcək və onun məqsədlərini dəqiqləşdirəcəklər. Bu barədə çərşənbə axşamı Trend-ə AİB-in ölkədəki nümayəndəliyinin rəhbəri Olli Noroyono bildirib.
Bu məqsədlə mayın ilk yarısında ölkədə bankın yol layihələri üzrə koordinatoru - Mərkəzi və Qərbi Asiya üzrə Departamentin mütəxəssisi Reddi Batulanın başçılığı ilə AİB-in missiyası Azərbaycana səfər edəcək.
800 milyon dollar dəyəri olan ikinci proqramın (Second Road Network Development Program) təsdiqi 2012-ci il sentyabrın 28-nə planlaşdırılıb, iyunun 29-dan iyulun 13-dək isə təfərrüatların öyrənilməsi üzrə işlər aparılacaq.
MFF vəsaitləri hesabına "Cənub dəhlizi" çərçivəsində yeni Ələt-Masallı dördzolaqlı avtomobil magistralının tikintisi, "Şərq-Qərb" dəhlizi çərçivəsində Gəncəni Azərbaycan-Gürcüstan sərhədi ilə birləşdirən yolun dörd zolağadək genişləndirilməsi və digər işlərin maliyyələşdirilməsi planlaşdırılır.
MFF-in 100 milyon dollar dəyərində birinci tranşının bəyənilməsi 2012-ci il oktyabrın 9-da gözlənilir.
Proqram çərçivəsində AİB Azərbaycana 225 min dollar həcmində texniki yardım göstərməyi də bəyənib.
"Səfər çərçivəsində, həmçinin, birinci multitranş proqramı çərçivəsində işlərin icmalı aparılacaq. Hesab edirik ki, bu işlər vaxtında tamamlanacaq", - Noroyono qeyd edib.