Azərbaycan, Bakı, 25 aprel /Trend, müxbir E.İsmayılov/
"Azərbaycan Dəmir Yolları" QSC maydan etibarən bir müddət əvvəl təmir məqsədilə Ukraynaya göndərilən sərnişin vaqonlarını təhvil almağa başlayacaq. Trend-in məlumatına görə, bu barədə çərşənbə günü jurnalistlərə QSC-nin rəhbəri Arif Əsgərov bildirib.
Bir müddət əvvəl QSC-nin 50 vaqonu Azərbaycanda sərnişin qatarlarının əsaslı təmiri üzrə texnologiyaların olmaması səbəbindən Ukraynaya zavod təmirinə göndərilib.
Qatarların təmiri ilə əlaqədar olaraq, hazırda Moskva və Sankt-Peterburq istiqamətində sərnişin reyslərində "Rusiya Dəmir Yolları" ASC-nin qatarları işləyir.
Bu reyslərdə Rusiya qatarlarının işi fevral ayından başlayıb.
Yük daşımalarına toxunan Əsgərov qeyd edib ki, I rübdə dəmiryolu nəqliyyatında yük daşımaları 6 faiz artıb.