Azərbaycan, Bakı, 26 aprel /Trend, müxbir İ. Xəlilova/
Azərbaycanda son makroiqtisadi tendensiyalar və perspektivləri müzakirə etmək məqsədilə Beynəlxalq Valyuta Fondunun (BVF) Yaxın Şərq və Mərkəzi Asiya üzrə Departamentində (MCD) şöbə direktorunun müavini Nədim İlahinin rəhbərlik etdiyi missiyasnın Bakıya səfəri başlayıb. Bu barədə cümə axşamı Trend-ə ölkə hökumətindən bildiriblər.
Səfər mayın 2-dək davam edəcək.
"Hökumətin ölkə iqtisadiyyatının inkişaf perspektivləri üzrə qısamüddətli və ortamüddətli vəzifələrinin qiymətləndirməsini aparmasının əsas məqsədi adətən BVF-nin sazişinin IV maddəsi üzrə müzakirələrin prioritet istiqamətlərinin müəyyənləşdirilməsidir. Bu çərçivədə məsləhətləşmələr payızda aparılır" , - hökumətdən qeyd ediblər.
Səfər çərçivəsində, həmçinin BVF-nin texniki yardımını almaq üçün istiqamətlər, fiskal, pul-kredit, siyasət kursunun yerinə yetirilməsi ilə bank sektorundakı vəziyyət, maliyyə sabitliyinin gücləndirilməsi üçün ölkədə həyata keçiriləm makroprudensial və nəzarət tədbirlərinin müzakirəsi gözlənilir.
Fondun missiyası Nazirlər Kabineti, Maliyyə, Vergilər, İqtisadi İnkişaf nazirlikləri, Dövlət Neft Fondu, ölkənin kommersiya banklarının birində ("PashaBank") və s. görüşlər keçirməyi planlaşdırır.
