Azərbaycan, Bakı, 2 may /Trend, müxbir A.Axundov/
Azərbaycan Beynəlxalq Əməliyyat Şirkəti (ABƏŞ) 2011-ci ildə PSA tipli səkkiz saziş çərçivəsində mənfəət vergisi üzrə 1,381 milyard manat ödəyib ki, bu da 2010-cu ilin göstəricisindən 523,2 milyon manat və ya 60,99 faiz çoxdur.
Trend-in məlumatına görə, bu barədə çərşənbə günü Azərbaycan Vergilər Nazirliyinin "Vergilər" qəzetində dərc edilən məlumatda deyilir.
Əməliyyat şirkətləri, podratçı tərəflər və subpodratçı müəssisələrin xarici əməkdaşlarının gəlir vergisi 2011-ci ildə 110,29 milyon manat təşkil edib ki, bu da 2010-cu ilin göstəricisindən 20,03 manat və ya 22,19 faiz çoxdur. Bu rəqəm 2012-ci ilin birinci rübündə 19,6 milyon manat olub ki, bu da 2011-ci ilin analoji dövr göstəricisini 0,98 milyon manat və ya 5,28 faiz üstələyir.
"Bu müəssisələr Xüsusi Rejimli Vergi Xidməti Departamentində uçota alınır. Hazırda həmin departamentdə 763 vergi ödəyicisi (onlardan 493-ü iri vergi ödəyicisidir), 270 xüsusi vergi rejimli müəssisə qeydiyyata alınıb", - məlumatda deyilir.
