Azərbaycan, Bakı, 21 may /Trend, müxbir A.Axundov/
Dünya Bankı (DB) və Azərbaycan hökuməti "Azərbaycan kənd investisiyaları" (AzRIP) ikinci layihəsi çərçivəsində rəsmi danışıqların gedişində layihənin dəyərini razılaşdırıblar. Bu barədə bazar ertəsi Trend-ə bankın Bakı nümayəndəliyindən məlumat verilib.
Danışıqlar mayın 16-da başlayıb. Bu məqsədlə layihənin rəhbəri Daniel Ouenin başçılıq etdiyi missiya Bakıya gəlib.
Bankın nümayəndəliyinin məlumatında deyildiyi kimi, layihənin dəyəri 53,6 milyon dollar təşkil edir ki, bundan 30 milyon dollar Beynəlxalq Yenidənqurma və İnkişaf Bankının (IBRD, DB qrupuna daxildir) xətti ilə, 23,6 milyon dollar isə Azərbaycan hökumətinin layihədəki iştirak payı hesabına veriləcək.
"Bir həftə ərzində danışıqların yekunları üzrə protokol imzalanacaq. Bu, layihənin nümayəndə heyəti səviyyəsində bəyənildiyinə sübutdur və layihənin baxılmaq üçün Direktorlar Şurasına verilməsi üçün əsasdır", - bankdan deyiblər.
Bankdan bildirildiyi kimi, Direktorlar Şurasında layihəyə iyulun 5-də baxılacağı gözlənilir.