Azərbaycan, Bakı, 11 iyun /Trend, müxbir Ə.Həsənov/
Almaniya Azərbaycan iqtisadiyyatına birbaşa investisiyalar yatırmaqda maraqlıdır. Trend-in məlumatına görə, bu barədə bazar ertəsi jurnalistlərə Azərbaycan iqtisadi inkişaf nazirinin müavini Niyazi Səfərov Bakıda keçirilən Azərbaycan-Almaniya biznes forumunun yekunu üzrə bildirib.
"Azərbaycan 150 dövlətlə əməkdaşlıq edir və Almaniya bizim üçün əsas ticari-iqtisadi tərəfdaşlarımızdan biridir", - Səfərov deyib.
Onun sözlərinə görə, 2011-ci ildə Almaniya və Azərbaycan arasında əmtəə dövriyyəsi 2010-ci ilə nisbətən iki dəfə, cari ilin yanvar-aprel aylarının yekunları üzrə ötən ilin analoji dövrü ilə müqayisədə isə üç dəfə artıb.
Nazir müavini deyib ki, hazırda Azərbaycanda infrastruktur layihələrində fəaliyyət göstərən 100-dən artıq Almaniya şirkəti işləyir, Almaniyada Azərbaycan şirkətlərinin sayı da daim artır.
Onun sözlərinə görə, noyabrda ticarət və investisiyalar sahəsində əməkdaşlıq üzrə Azərbaycan-Almaniya işçi qrupunun ikinci iclası keçiriləcək.