Azərbaycan, Bakı, 2 iyul /Trend, müxbir A.Axundov/
Hazırda daxili istehsalat hesabına Azərbaycan əhalisinin heyvandarlıq məhsullarına olan tələbatının 80 faizi təmin edilir.
Bu barədə bazar ertəsi Trend-ə Azərbaycan kənd təsərrüfatı nazirinin müavini Bəhram Əliyev bildirib.
"Azərbaycanın heyvandarlıq məhsullarına tələbatı ildə 345 min ton təşkil edir. Biz daxili istehsalat hesabına tələbatın 80 faizini təmin edirik", - Əliyev qeyd edib.
Onun sözlərinə görə, "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı"na əsasən, 2015-ci ilədək bu tələbat daxili istehsalat hesabına tam ödənilməlidir.
"Biz bu istiqamətdə çox işlər görürük. Ölkəyə Avstriya və Almaniyadan cinsi mal-qara gətirilir. Biz mal-qaranın sayını artırmaq fikrində deyilik, əvəzində cins mal-qara sürüsünün yaxşılaşdırılması sayəsində istehsalatı artırmaq niyyətindəyik. Bu istiqamətdə böyük nəticələr əldə etmişik. Bundan savayı, dövlət fermerlərə subsidiya və kreditlər verməyə, habelə digər zəruri addımlar atmağa davam edir", - Əliyev vurğulayıb.