Azərbaycan, Bakı, 11 iyul/Trend, müxbir A. Tağıyeva/
Türkiyədə işləyən İran sahibkarları bu ölkədə xeyli miqdarda qızıl alır və onu İran Mərkəzi Bankına və ya xüsusi şəxslərə satır. Trend-in məlumatına görə, bu barədə çərşənbə günü "Zaman" qəzeti Türkiyə hökumətindəki mənbəyə istinadən məlumat verir.
Məlumata əsasən, məhz bu səbəbdən Türkiyədən İrana qızıl ixracı son altı ay ərzində rekord səviyyəyə - 3 milyard dollara çatıb.
İranın neft sahəsinə qarşı sanksiyalar tətbiq edildikdən sonra Tehran sanksiyaların qızıl sektoruna da şamil ediləcəyindən narahatdır. Buna görə də, ölkənin Mərkəzi Bankı xeyli miqdarda qızıl ehtiyatı yığır.
Mənbə onu da vurğulayıb ki, İran Türkiyə ilə yanaşı, Dubay (BƏƏ) və Hindistandan da iri həcmlərdə qızıl satın alır.
