Azərbaycan, Bakı, 14 avqust /Trend, müxbir A.Axundov/
Türkdilli Ölkələrin Əməkdaşlıq Şurasının üzvləri qarşılıqlı investisiyaların təşviqi mexanizmlərini inkişaf etdirməlidirlər.
Trend-in məlumatına görə, bu barədə Türkiyənin iqtisadiyyat naziri Zəfər Çağlayan çərşənbə axşamı Bakıda Şuranın üzvü olan ölkələrin iqtisadiyyat nazirlərinin ikinci görüşündə çıxışı zamanı bildirib.
"2003-cü ildən 2010-cu ilədək olan dövrdə Türkiyə iqtisadiyyatına ümumi məbləği 115 milyard dollar həcmində birbaşa xarici investisiyalar qoyulub ki, bu da bundan əvvəlki 80 il ərzində olan göstəricini 7 dəfə üstələyir. 2012-ci ilin yarım ili ərzində Türkiyə iqtisadiyyatına 8,2 milyard dollar xarici sərmayə qoyulub, ilin sonunadək isə bu rəqəmin 20 milyard dollarа çatacağı gözlənilir. Bu, Türkiyədə xarici sərmayədarların gəlişi üçün əlverişli şəraitin yaradılmasından xəbər verir", - Çağlayan deyib.
Onun sözlərinə görə, bu gün xaricdəki türk investisiyaları 18 milyard dollar təşkil edir ki, bunun da yarısından çoxu Şuranın üzvü olan ölkələrin payına düşür.
"Bu gün Azərbaycanda Türkiyə investisiyaları yeddi milyard dollar, Qazaxıstanda iki milyard dollar, Qırğızıstanda bir milyard dollar təşkil edir", - Çağlayan deyib.
Nazir hesab edir ki, Şuraya üzv olan ölkələrin qarşılıqlı investisiyalarının səviyyəsi mövcud böyük potensiala uyğun gəlmir.
Bakı görüşündə Azərbaycanın, Türkiyənin, Qazaxıstanın və Qırğızıstanın iqtisadiyyat nazirləri, eləcə də həmin ölkələrin dövlət və özəl sektorlarının nümayəndələri iştirak edirlər. İclas zamanı tərəfər arasında hazırkı vəziyyət və əməkdaşlığın genişlənbdirilməsinin perspektivləri müzakirə olunacaq.
Türkdilli Dövlətlərin Əməkdaşlıq Şurasının iqtisadiyyat nazirlərinin ilk görüşü 2011-ci il oktyabrın 13-də Qazaxıstanın paytaxtı Astanada keçirilib. Orada Azərbaycanın, Türkiyənin, Qazaxıstanın və Qırğızıstanın iqtisadiyyat nazirləri və nazir müavinləri iştirak ediblər.