Azərbaycan, Bakı, 17 sentyabr /Trend, müxbir Ə.Həsənov/
2012-ci ilin yanvar-avqust aylarında Azərbaycanda inşaat işlərinin həcmi ötən ilin analoji dövrü ilə müqayisədə 34,9 faiz artıb. Trend-in məlumatına görə, bu barədə Dövlət Statistika Komitəsinin hesabatında deyilir.
O cümlədən, dövlət şirkətləri tərəfindən həyata keçirilən inşaat işlərinin həcmi işlərin ümumi həcminin 24,7 faizini, özəl şirkətlər tərəfindən isə 75,3 faizini təşkil edib.
Görülmüş ümumi tikinti işlərinin 73,2 faizini yeni tikinti, yenidənqurma və genişlənmə, 14,1 faizini əsaslı təmir, 2,3 faizini cari təmir, 10,4 faizini isə digər tikinti işləri təşkil edib.
2012-ci ilin yanvar-avqust aylarında inşaat bölməsində çalışmış 86,9 min nəfərin orta aylıq əməkhaqqısı əvvəlki ilin müvafiq dövrünə nisbətən 8,4 faiz artaraq 557,1 min manat təşkil edib. Bu zaman dövlət şirkətlərində əməkhaqqı 452,4 manat (il ərzində artım 18,9 faiz), özəl şirkətlərdə isə 626,6 manat (artım 1,8 faiz) təşkil edib.
İri və orta tikinti müəssisələrində işləyənlərin orta aylıq nominal əməkhaqları 584,3 min manat olub. Bu, binaların tikintisi sahəsində 1,3 faiz artaraq 540,6 manat, mülki təyinatlı inşaat işlərində 19,3 faiz artaraq 403,6 manat, ixtisaslaşdırılmış tikinti işlərində isə 14,5 faiz artımla 700,3 manat olub.
