Azərbaycan, Bakı, 18 sentyabr /Trend, müxbir A.Axundov/
Azərbaycan və Gürcüstan Cənubi Qafqaz regionunun populyarlaşdırılması və xarici turistlərin cəlb edilməsi üçün səylərini birləşdirməlidirlər. Bu barədə çərşənbə axşamı Trend-ə Bakıda mehmanxana sektorunun regional inkişafi və investisiya mühiti, həmçinin sənayenin digər aktual məsələlərinə həsr edilmiş MDB ölkələri və Gürcüstan (iCON) üzrə ilk mehmanxana investisiya konfransının işində iştirak edən Gürcüstanın iqtisadiyyat və davamlı inkişaf nazirinin birinci müavini İrakli Matkava deyib.
"İlk növbədə, turizm sahəsində Azərbaycan və Gürcüstan arasında əməkdaşlıq o baxımdan vacibdir ki, Cənubi Qafqaz dünya turizm xəritəsində bu yaxınlarda meydana gəlib və regionu çox intensiv inkişaf etdirmək lazımdır. Bu mənada insan, dövlət, təbiət və s. resurslarımızı birləşdirməyimiz çox əhəmiyyətlidir. Belə əlaqələrin olması və birgə məhsullar təqdim etmək vacibdir. Bu istiqamətdə əməkdaşlığımız irəliləyir", - Matkava qeyd edib.
Onun sözlərinə görə, artıq Gürcüstan və Azərbaycan turizm operatorlarının birgə işinin olduqca yaxşı tarixi var.
"Əlbəttə ki, bu, hər iki ölkə hökumətinin dəstəyi ilə həyata keçirilir. Biz Azərbaycan turistlərinin sayının artmasına görə şadıq. Bu bizim üçün çox vacibdir, çünki bu, ölkə iqtisadiyyatı, qarşılıqlı əlaqələrin möhkəmləndirilməsi üçün yaxşıdır. Xeyli sayda gürcü turistlər Bakıya gəlir. Məsələn, Gürcüstanda Yeni ili Bakıda qeyd etmək dəbdədir", - Matkava vurğulayıb.
Onun sözlərinə görə, turizmin inkişafı ilə bilavasitə əlaqəsi olan bir sıra məsələlər də mövcuddur.
"Məsələn, ətraf mühit və mədəniyyət abidələrinin birgə mühafizəsi ilə bağlı məsələlər. Bu çox vacibdir, belə ki, birbaşa turizmin inkişafına təsir edir. Bütün bu məsələlər üzrə gündəlik intensiv iş aparılır", - Matkava deyib.