Azərbaycan, Bakı, 27 sentyabr /Trend, müxbir T.Cəfərov/
Cari ilin əvvəlindən indiyədək (İranda il martın 21-də dəyişir) Astara sərhəd keçid məntəqəsindən 10 min ton məhsul (portfel ticarəti vasitəsilə) Azərbaycana ixrac olunub. İxrac olunmuş məhsulların dəyəri 24 milyon dollardır. Bunu İranın Gilan əyalətinin Gömrük nəzarəti idarəsinin rəhbəri Pərviz Təqəvi deyib. Bu barədə Trend İranın ISNA agentliyinə istinadən məlumat verir.
Təqəvinin sözlərinə görə, ixrac edilmiş məhsullar ötən ilin analoji dövrü ilə müqayisədə dəyər baxımından 68 faiz, çəki baxımından isə 53 faiz artıb.
Onun sözlərinə görə, həmin müddət ərzində 264 487 nəfər Gilan əyalətində yerləşən sərhəd keçid məntəqəsindən İrana gediş-gəliş edib. Bu göstərici ötən ilin analoji dövrü ilə müqayisədə 18 faiz artıb.
Təqəvi bildirib ki, Azərbaycana (portfel ticarəti olaraq) ixrac olunan məhsullar əsasən ərzaq malları, təmizləyici vasitələr, paltar, konservləşdirilmiş məhsullar, plastik məmulatlar, meyvə və tərəvəz, müxtəlif növ içkilər, gül və bitkilərdir.
İran Azərbaycan vətəndaşları üçün viza rejimini birtərəfli qaydada ləğv edib. 2010-cu il fevralın 1-dən etibarən İrana gedən Azərbaycan vətəndaşlarından viza tələb olunmur.
