Azərbaycan, Bakı, 2 oktyabr /Trend, müxbir A.Axundov/
"Anglo-Asian Mining plc" şirkəti (Azərbaycanda qızıl istehsalçısı) 2012-ci ilin ilk yarısını 14,2 milyon dollar həcmində ümumi gəlirlə başa çatdırıb. Ötən ilin analoji dövründə bu rəqəm 19,8 milyon dollar olub. Trend-in məlumatına görə, bu barədə çərşənbə axşamı şirkətin məlumatında deyilir.
"Bu il havaların çox soyuq keçməsi səbəbindən istehsal üzrə göstəricilər planlaşdırılandan az olub. Nəticədə şirkətin gəlir və mənfəəti ötən ilin analoji göstəricilərinə nisbətən azalıb. Lakin ilin ikinci yarısında istehsalın yüksək olacağı gözlənilir" , - məlumatda deyilir.
Yarımilliyin yekunları üzrə vergitutumunadək mənfəət 10,5 milyon dollar təşkil edib, halbuki 2011-ci ilin ilk 6 ayı ərzində bu rəqəm 14,2 milyon dollar olub.
İl ərzində şirkətin gəlirləri 21,82 faiz azalaraq 2012-ci ilin yanvar-iyun aylarının yekunları üzrə 30,1 milyon dollar təşkil edib. Gəlirlər əsasən qızıl satışı hesabına formalaşdırılıb. Şirkət ilk 6 ay ərzində 18135 unsiya qızılı 1 unsiyaya görə orta hesabla 1644 dollara satıb.
Əməliyyat fəaliyyətindən əldə edilən pul axını işçi kapitalına çevrilənədək 15,5 milyon dollar təşkil edib (2011-ci ilin ilk yarısında 24,8 milyon dollar olub).
Bununla yanaşı, şirkətin aktivləri 2012-ci ilin ilk yarımilliyinin sonuna 46,1 milyon dollara çatıb. 2011-ci ilin sonunda bu göstərici 41 milyon dollar olub. 2011-ci ilin iyun ayının sonunda şirkətin aktivləri 31,7 milyon dollar səviyyəsində olub. Aktivlərin artması material-istehsalat ehtiyatlarının artması ilə əlaqədardır.
Şirkət cari ilin ilk yarımilliyində Gədəbəy qızıl yatağından 21641 unsiya qızıl istehsal edib. İkinci rübdə qızıl istehsalı 11716, birinci rübdə 9925 unsiya qızıl təşkil edib.
