Azərbaycan, Bakı, 31 oktyabr /Trend, müxbir A.Axundov/
Azərbaycanda səhiyyə sistemində islahatların aparılması üzrə Dünya Bankının (DB) layihəsinin həyata keçirilmə müddəti 2013-cü ilin ortalarına qədər uzadılıb. Bu barədə çərşənbə günü Trend-ə bankın Bakı nümayəndəliyindən bildiriblər.
Qeyd edək ki, layihəni bu ilin sonunda yekunlaşdırmaq planlaşdırılırdı.
"Planlaşdırılan bütün işlərin başa çatdırılması üçün əlavə vaxt lazımdır", - bankdan deyiblər.
Bankdan daha əvvəl bildirmişdilər ki, layihə çərçivəsində bütün əsas işlər artıq tamamlanıb.
"Tikinti hissəsi demək olar ki, başa çatıb, texniki yardım üzrə işlər də yekunlaşmaq ərəfəsindədir", - bankdan qeyd ediblər.
