Azərbaycan, Bakı, 15 noyabr /Trend, müxbirlər A.Axundov, E.İsmayılov/
Azərbaycan Respublikası Dövlət Neft Fondu (ARDNF) daha əvvəl alınan fiziki qızılın ilk hissəsini cari ilin sonunadək ölkəyə gətirəcək. Trend-in məlumatına görə, bu barədə cümə axşamı jurnalistlərə Fondun sədri Şahmar Mövsümov bildirib.
Mövsümovun sözlərinə görə, ölkəyə idxal edilməsi planlaşdırılan qızılın ilk hissəsinin ümumi çəkisi təqribən 1 ton təşkil edəcək. Çəkisi 1 tondan çox olan qızılın idxalı mürəkkəb prosesdir, çünki aviaşirkətlər böyük həcmdə qiymətli metalları daşımaq istəmirlər.
"Buna görə də alınan qızıl ölkəyə tədricən idxal ediləcək. Əsas məqsəd təhlükəsizliyi təmin etməklə qızılın bütün həcmini idxal etməkdir", - Mövsümov qeyd edib.
Mövsümov deyib ki, ARDNF artıq Azərbaycan Mərkəz Bankı (AMB) ilə qızılın saxlanılması məsələsi üzrə danışıqları başa çatdırıb. AMB-nin imkanları və iki struktur arasındakı yüksək əməkdaşlıq səviyyəsi Fondun qızıl aktivlərini saxlamağı təmin etməyə imkan verir.
Qeyd edək ki, ümumilikdə ARDNF iki il ərzində mövcud qiymət dəyişikləri ilə əlaqədar mərhələli şəkildə təqribən 30 ton qızıl almağı planlaşdırır.
