Azərbaycan, Bakı, 21 may /Trend, müxbir A.Axundov/
2013-cü ilin ilk dörd ayı ərzində "Avtonəqliyyat vasitəsi sahiblərinin mülki məsuliyyətinin icbari sığortası" üzrə informasiya sistemində İcbari Sığorta Bürosunun iştirakçıları olan sığorta şirkətləri tərəfindən müvafiq icbari sığorta növü üzrə ümumilikdə 5153 sığorta tələbi qeydiyyata alınıb.
Bürodan Trend-ə verilən məlumata görə, qeydiyyata alınmış sığorta tələblərindən 5139-u üzrə sığorta ödənişləri həyata keçirilib. 9 sığorta tələbi üzrə sığorta ödənişi verilməsindən imtina olunub, 211 sığorta tələbi isə hazırda baxılma mərhələsindədir.
İcbari Sığorta Bürosu bildirir ki, avtonəqliyyat vasitəsi sahiblərinin mülki məsuliyyətinin icbari sığortası üzrə bağlanılmış sığorta müqavilələrinin sayı və toplanılan sığorta haqları ilə yanaşı, sığorta şirkətləri tərəfindən edilən ödənişlərin məbləğində də artım müşahidə olunub. Belə ki, ötən il bu icbari sığorta növü üzrə sığorta şirkətlərinə qarşı irəli sürülmüş sığorta tələblərindən 4227-si üzrə 6,823,630.61 manat məbləğində ödəniş həyata keçirildiyi halda, 2013-cü ilin ilk 4 ayında 5139 sığorta tələbi üzrə 7227396.01 manat məbləğində vəsait ödənilib.
2013-cü ildə ödənilən sığorta tələblərinin isə 5041-i əmlaka, 74-ü sağlamlığa dəyən zərərin əvəzinin ödənilməsi, 24-ü şəxsin ölümü ilə bağlı olub.
2012-ci ildə ödənilən sığorta tələblərinin zərərin növü üzrə bölgüsünə baxsaq görərik ki, sığorta tələblərinin 4156-sı əmlaka, 47-si sağlamlığa dəyən zərərin əvəzinin ödənilməsi, 24-ü isə şəxsin ölümü ilə bağlı olub.
Bundan əlavə, icbari sığorta müqaviləsi mövcud olmayan və ya naməlum avtonəqliyyat vasitələri tərəfindən törədilən hadisələr nəticəsində sağlamlığa dəyən zərərlə bağlı Büro tərəfindən 18.04.2012-ci il tarixindən 17.05.2013-cü il tarixinədək 26691,5 manat məbləğində 10 kompensasiya ödənişi həyata keçirilib. Bunlardan 6-sı zərərçəkən şəxslərin müxtəlif dərəcəli bədən xəsarətləri alması, 4-ü isə ölüm halı ilə əlaqədar olaraq ödənilib.
2012-ci il və 2013-cü ilin ilk dörd ayı ərzində respublikada baş verən yol-nəqliyyat hadisələri nəticəsində xəsarət alanların və həlak olanların sayı 5487 nəfər olduğu halda, sağlamlığa dəyən zərər və ölüm halları ilə bağlı müvafiq ödənişlərin verilməsi üzrə sığorta şirkətlərinə və Büroya edilən müraciətlərin sayı cəmi 179 hal təşkil edib.