Azərbaycan, Bakı, 5 sentyabr /Trend, müxbir A.Axundov/
2013-cü ilin avqust ayında avtonəqliyyat vasitəsi sahiblərinin mülki məsuliyyətinin icbari sığortası üzrə 68,5 mindən çox sığorta müqaviləsi bağlanıb ki, bunların da 23,3 minə qədərini xarici ölkədə qeydiyyata alınmış və Azərbaycan Respublikasına tranzit məqsədilə daxil olan avtonəqliyyat vasitələri ilə bağlı olan və 1 ay müddətinə bağlanılan icbari sığorta müqavilələri təşkil edib.
Trend İcbari Sığorta Bürosuna istinadən məlumat verir ki, 2013-cü ilin avqust ayı ərzində bağlanmış icbari sığorta müqavilələri üzrə daxil olan sığorta haqlarının məbləği isə ümumilikdə 5,1 milyon manatdan çox olub.
2012-ci ilin müvafiq dövrü ilə müqayisədə bu icbari sığorta növü üzrə müqavilələrin sayında 5,4%, sığorta haqlarının məbləğində isə 15,1% azalma müşahidə edilib.
Cari ilin avqust ayında orta sığorta haqqı 75 manat təşkil edib.