Azərbaycan, Bakı, 18 noyabr /Trend, müxbir A.Axundov/
Azərbaycanın bank sektoru internet və mobil bankçılıq xidmətlərini genişləndirir. Belə ki, 2013-cü ilin yanvar-sentyabr aylarında internet bankçılıq çərçivəsində ümumi həcmi 54,9 milyon manat olan 15,7 min əməliyyat, mobil bankçılıq çərçivəsində isə 441 min manat məbləğində 4,5 min əməliyyat keçirilib.
Trend-in məlumatına görə, bu barədə Azərbaycan Mərkəzi Bankının (AMB) yanvar-sentyabrın nəticələri üzrə maliyyə sabitliyi hesabatında deyilir.
İlin əvvəlindən plastik kartların sayı 339 min artaraq 5,347 milyon ədədə çatıb. Hazırda Azərbaycanda 1000 nəfərə (yetkinlik yaşına çatmış) 891 plastik kart düşür.
Sentyabrın sonuna Azərbaycanda 2396 bankomat və 35 152 POS-terminal fəaliyyət göstərib. Hesabat dövründə bankomatların sayı 6 faiz artıb.
Cari ilin 9 ayında POS-terminallar vasitəsilə 677 milyon manat həcmində 7,434 milyon əməliyyat, bakomatlar vasitəsilə isə 6,39 milyard manat həcmində 37,544 milyon əməliyyat keçirilib.