Azərbaycan, Bakı, 14 dekabr /Trend, müxbir İ.Xəlilova/
Kənd Təsərrüfatı Nazirliyi 2014-cü ildə dənli bitkilərin istehsalının 3,9 faiz artımını proqnozlaşdırıır. Bu artım payızlıq səpin sahələrinin genişlənməsi ilə əlaqədardır.
Trend-in Dövlət Statistika Komitəsinin məlumatına istinadən verdiyi xəbərə görə, hazırda təsərrüfatlarda payızlıq taxıl bitkilərinin kütləvi səpini davam edir. Cari il dekabr ayının 1-nə olan vəziyyətə görə, 934,8 min hektar sahədə payızlıq bitkilər, o cümlədən 918,3 min hektarda dən üçün payızlıq bitkilər səpilib. Dən üçün payızlıq bitkilərin 616,7 min hektarını (67,2 faizi) buğda, 301,6 min hektarını (32,8 faizini) isə arpa təşkil edib.
2012-ci ilin müvafiq dövrü ilə müqayisədə dən üçün payızlıq bitkilərin əkin sahəsi 3,2 faiz, o cümlədən arpanın əkin sahəsi 11,4 faiz artıb, buğdanın əkin sahəsi isə 0,4 faiz azalıb.
Dənli bitkiləri üçün əkin sahələri 28,23 hektar artıb ki, bu da Azərbaycand dən isehsalının artmasını proqnozlaşdırmağa imkan verir.
Komitənin məlumatına görə, dekabrın 1-nə olan məlumata əsasən, Azərbaycanda qarğıdalı da daxil olmaqla, 2961,8 min ton dənli bitki istehsal edilib.
Hazırda Azərbaycanın dənli bitkilərə olan tələbatı 3-3,2 milyon ton qiymətləndirilir.