Azərbaycan, Bakı, 23 yanvar /Trend, müxbir E.İsmayılov/
2013-cü ilin yanvar-noyabr aylarında Azərbaycana 7 min yük avtomobili idxal olunub ki, bu da 2012-ci ilin analoji dövrünün göstəricisindən 18,9 faiz azdır. Bu barədə Trend-ə Dövlət Statistika Komitəsindən məlumat verilib.
İdxal olunan yük avtomobillərinin dəyəri 82,8 milyon dollara yaxın təşkil edib. Bu, 2012-ci ilin müvafiq dövrünün göstəricisindən 58,5 faiz azdır.
Ümumilikdə 2012-ci ildə Azərbaycana 9432 ədəd yük avtomobili idxal olunub ki, bu da 2011-ci ilin göstəricisindən 52,7 faiz çoxdur. İdxal olunan yük avtomobillərinin ümumi dəyəri 213,4 milyon dollardan artıq olub. Bu, 2011-ci ilin göstəricisindən 45,6 faiz çoxdur.
Həmçinin, 2013-cü ilin yanvar-noyabr aylarında Azərbaycana 740 avtobus idxal olunub ki, bu da 2012-ci ilin müvafiq dövrünün göstəricisindən 25,7 faiz azdır. İdxal olunan avtobusların ümumi dəyəri təqribən 34,5 milyon dollar təşkil edib. Bu, 2012-ci ilin analoji dövrünün göstəricisindən 28,6 faiz azdır.
Ümumilikdə 2012-ci ildə Azərbaycana 1038 ədəd avtobus gətirilib ki, bu da 2011-ci ildə qeydə alınan göstəricidən 58,5 faiz çoxdur. İdxal olunan avtobusların ümumi dəyəri 49,88 milyon dollardan artıq olub. Bu, 2011-ci ilin göstəricisindən 88,1 faiz çoxdur.
