Azərbaycan, Bakı, 18 avqust /Trend, müxbir Emil İsmayılov/
2014-cü ilin yanvar-iyul aylarında Azərbaycan ərazisindən nəqliyyat vasitələri ilə 21,44 milyon tondan artıq yük daşınıb ki, bu da ötən ilin analoji dövr göstəricisindən 8,08 faiz azdır. Trend-in məlumatına görə, bu barədə Azərbaycan Dövlət Gömrük Komitəsinin (DGK) hesabatında deyilir.
Bu dövr ərzində yük ixracatı təqribən 16,7 milyon ton, idxalat isə təqribən 4,8 milyon ton təşkil edib.
Yanvar-iyul ayları ərzində dəniz nəqliyyatı ilə 92,13 min ton, dəmiryolla 1,48 milyon ton, avtomobil nəqliyyatı ilə 309,95 min ton, hava nəqliyyatı ilə 49,58 min ton yük ixrac edilib, stasionar nəqliyyat vasitələri ilə daşımalar isə 14,74 milyon ton olub.
Ölkəyə dəniz nəqliyyatı ilə 1,09 milyon ton, dəmiryolla 2,5 milyon ton, avtomobil nəqliyyatı ilə 1,15 milyon tondan çox, hava nəqliyyatı ilə 6,64 min ton yük gətirilib.