Azərbaycan, Bakı, 21 noyabr /Trend, müxbir Azad Həsənli/
Azərbaycanda qızıl istehsalı ilə məşğul olan "Anglo-Asian Mining plc" şirkəti 2014-cü ilin qızıl hasilatı proqnozunu 60 min unsiyayadək azaldıb. Trend xəbər verir ki, bu barədə cümə günü şirkətin saytında yerləşdirilmiş məlumatda deyilir.
Bundan əvvəl şirkət ilin sonunadək hasil edilən qızılın ümumi həcmini 62 min unsiyaya, SART metodu ilə mis hasilatını isə 750 min tona çatdırmağı planlaşdırmışdı.
Məlumatda deyilir: "Hasilatın azalması 2014-cü il noyabrın əvvəlindən yuma qurğusunun buraxılış qabiliyyətinin gözlənildiyindən daha aşağı olması səbəbindən qızıl hasilatı səviyyəsinin proqnozlaşdırılandan aşağı olması ilə bağlıdır".
Proqnozların azalması və bu yaxınlarda qızılın qiymətinin aşağı düşməsi nəticəsində AAM Direktorlar Şurası ilin sonunda vergitutmadan sonra şirkətin zərərininbazrın gözlədiyindən daha çox olacağını gözləyir.
2014-cü ilin üçüncü rübündə "Anglo-Asian Mining" şirkəti "Gədəbəy" və "Qoşa" yataqlarından 16 178 unsiya qızıl hasil edib ki, bu da ikinci rübdəkindən 2,8 faiz çoxdur. Müqayisə üçün: ikinci rübdə 15 736 unsiya qızıl istehsal olunub. Birinci rübdə bu göstərici 11 318 unsiya təşkil edib.
Hesabat dövründə şirkət bir unsiyasının orta qiyməti 1 281 dollar olmaqla 13 797 unsiya qızıl satıb. Müqayisə üçün: ikinci rübdə bu rəqəm bir unsiyasının orta qiyməti 1 292 dollara olmaqla 13 142 unsiya, birinci rübdə isə bir unsiyasının orta qiyməti 1 303 dollar olmaqla 10 403 unsiya təşkil edib.
On ay ərzində qızıl satışının ümumi həcmi bir unsiyasının orta qiyməti 1 292 dollar olmaqla 37 343 unsiya olub.