Sentyabrın 10-15-də İtaliyanın "Fava" şirkətinin nümayəndələri Xaçmazda makaron fabrikinin inşası üzrə layihə çərçivəsində müzakirələr aparmaq üçün Azərbaycana gələcəklər. Bu barədə Trend ə avqustun 30-da Azərbaycan-Türk sahibkarları Cəmiyyətinin (ATİB) idarə heyətinin sədri Əhməd Erentok məlumat verib.
Onun sözlərinə görə, danışıqların aparılmasında məqsəd layihə üzrə etibarlı tərəfdaş tapmaqdır. "Biz Azərbaycanda keyfiyyətli məhsul istehsal etməkdə və onun ixracı üçün etibarlı tərəfdaş tapmaqda maraqlıyıq", - deyə o bildirib. Layihə Atasənaye (Ata Holdinqin müəssisəsi) tərəfindən həyata keçirilir və fabrikin inşası üzrə işlərin sentyabrın sonunda başlanacağı nəzərdə tutulur.
Fabrik birgə müəssisə kimi fəaliyyət göstərəcək. O, İtaliya istehsalı olan avadanlıqlarla təchiz olunacaq, istehsal olunmuş makaron məmulatlarının üzərinə isə İtaliya şirkətinin nişanı vurulacaq.
Məhsulun üzərində onun Azərbaycanda istehsal olunması göstəriləcək. Həmçinin istehsal olunmuş makaron məmulatlarının 70%-ə qədərinin ixrac olunacağı planlaşdırılır.
Layihə dəyəri təxminən $5 mln olan fabrikin illik istehsal gücü 11-12 min tondur. Təxminən 150 nəfər adam bu müəssisədə işlə təmin olunacaq. Fabrik gələn ilin ortalarında istismara veriləcək.
