Azərbaycan Yaponiya hökuməti və AİB-nin dəstəyi və Asiya ölkələri ali auditor institutlarının (ASOSAI) təşkilatçılığı ilə keçirilən beynəlxalq seminarda iştirak edib. Noyabrın 15-dən 20-dək Alma-atada keçirilən seminarda AR Hesabat Palatasının sədr müavini Abbas Allahverdiyevin başçılıq etdiyi nümayəndə heyəti iştirak edib. HP beynəlxalq əlaqələr şöbəsinin müdiri Fuad İbrahimov Trend ə bildirib ki, seminarda Azərbaycan ilə yanaşı Orta Asiya ölkələri və Monqolustan da iştirak edirdi.
Onun sözlərinə görə, tədbirin keçirilməsində məqsəd ali Maliyyə Nəzarəti orqanlarının fəaliyətinin inkişafındakı problemlərin müəyyən edilməsinə və bunların həlli yollarına yönəldilmiş işlərin razılaşdırılmasıdır.
Dövlət strukturunun nümayəndəsi həm də qeyd edib ki, seminarın işində Azərbaycan auditor fəaliyyətinin müxtəlif növləri, xüsusilə gəlirlərin, ekologiyanın, İKT və s. auditi üzrə perspektivli seminarların keçirilməsi ilə bağlı öz təkliflərini verib.
"Təşkilat bütün təkliflərə yenidən baxaraq auditor fəaliyyətinin müəyyən istiqamətləri üzrə HP əməkdaşları üçün seminarlar keçirilməsi barədə qəti qərar qəbul edəcək" -deyə F.İbrahimov bildirib.
Asiya ölkələri ali auditor institutları təşkilatı (The Asian Organization of Supreme Audit Institutions ASOSAI) Beynəlxalq ali auditor institutları təşkilatının (International Organization of Supreme Audit Institutions INTOSAI) 7 regional işçi qrupundan biridir və əsası 1979-cu ildə qoyulub. Üzvlük özündə təsisçi üzvləri, üzvləri və assosiasiya üzvlərini əhatə edir. Təşkilat üzvlərinin ümumi sayı 42-dir.