Yaxın vaxtlarda hökumətin spirtli içkilər və tütün məmulatlarının istehsalı üzrə müəssisələrin yeni lisenziyalaşdırılma qaydalarını verəcəyi gözlənilir. K/t nazirliyində Trend ə bildirilib ki, yeni qaydalar artıq hazırlanıb və müvafiq nazirliklər tərəfindən müsbət rəylər alınıb. "Hazırda həmin istiqamətlə bağlı Nazirlər Kabinetinin son qərarı gözlənilir" -deyə dövlət strukturunda bildirilib.
Ölkə prezidenti İlham Əliyevin "AR kənd təsərrüfatı və onun nəzdində dövlət agentliyklərinin və dövlət xidmətinin yaradılmasına dair əsasnamənin təsdiq edilməsi haqqında" 20 aprel 2005-ci il tarixli fərmanına əsasən Prezidentin 2002-ci il 2 sentyabr tarixli " Bəzi fəaliyyət növlərinə xüsusi icazənin (lisenziya) verilməsi qaydalarının təkmilləşdirilməsi haqqında" fərmanı ilə təsdiq olunmuş 10 və 11-ci bəndləri ilə öncə iqtisadi inkişaf nazirliyinə məxsus olan lisenziyanın verilməsi səlahiyyətləri kənd təsərrüfatı nazirliyinə verilib.
"Yeni qaydaların hazırlanmasının əsas məqsədi əhalinin aşağı səviyyəli spirtli içkilərdən və tütün məmulatlarından müdafiə olunmasıdır" -deyə nazirlikdə bildirilib.
2005-ci ilin aprelindən dövlət strukturu tərəfindən spirtli içkilərin istehsalına 8 lisenziya verilib. Lisenziyalar 5 il müddətinə 330 min manat dəyərində verilir.
Lisenziyalar verilərkən standartlaşdırma və metrologiya dövlət Agentliyi ilə birgə istehsal olunan məhsulun keyfiyyəti, bunların istehsal şərtlərinin müəyyən standartlara uyğunluğu araşdırılır.
"Ümumiyyətlə, spirtli içkilər və tütün məmulatları istehsalının lisenziyalaşdırılması başlandıqdan etibarən indiyədək 111 lisenziya verilib" -deyə nazirlikdə qeyd olunub.
