2006-cı ildə Aqrolizinq ASC-nin xətti ilə dövlət büdcəsindən ayrılmış 150 mlrd manat məbləğində kənd təsərrüfatı texnikası alınacaq. Trend in xəbər verdiyi kimi, bu barədə kənd təsərrüfatı naziri İsmət Abasov bildirib.
Onun sözlərinə görə, bu proses 2006-cı ilin yayınadək həyata keçiriləcək. "Müvafiq qaydada texnikanın alınması üzrə tender elan olunacaq", - deyə o qeyd edib.
2006-cı ildə gübrənin alınması üçün 50 mlrd manat ayrılıb.
Qeyd edək ki, Aqrolizinq ASC 2006-cı ildə birinci tenderi artıq keçirib və bir sıra şirkətlərin kənd təsərrüfatı texnikasının növbəti partiyasının alınmasına dair təkliflərini nəzərdən keçirir. Tender üzrə 30 taxılyığan kombaynın, 40 ədəd traktorun və 110 ədəd traktorlara qoşulan kənd təsərrüfatı maşınlarının alınması nəzərdə tutulub. Texnika Yaponiya hökumətinin Azərbaycana ayırdığı qrant hesabına alınacaq.