Azərbaycan və Rusiya hökumətləri Azərbaycan gəmilərinin Volqa-Don və Volqa-Balkan kanallarından keçməsi üçün uzunmüddətli əsaslarla razılığın alınmasına dair danışıqlar aparırlar. Trend in verdiyi məlumata görə, bu barədə jurnalistlərə fevralın 21-də baş nazirin birinci müavini Abbas Abbasov məlumat verib.
"Biz RF hökuməti qarşısında Rusiyanın daxili sularından birdəfəlik deyil, uzunmüddətli istifadəni nəzərdə tutan razılığın əldə olunması ilə bağlı məsələ qoymuşuq", - deyə A.Abbasov bildirib. Rusiya hökuməti 2005-ci il fevralın 14-də Azərbaycanın 24 gəmisinə Volqa-Don və Volqa-Baltik kanalından keçmək üçün icazə vermişdi.
Lakin, baş nazirin müavinin qeyd etdiyinə görə, Azərbaycan gəmilərin keçidinə birdəfəlik deyil, uzunmüddətli əsasda razılıq alınması niyyətindədir. Hazırda bu məsələ ilə bağlı iki ölkənin hökumətləri arasında danışıqlar aparılır.