Son illərdə vergi və gömrük daxilolmaları hesabına daxili imkanların artırılması ilə bağlı olaraq AR DNF-dən transfert həcminin azaldılması planlaşdırılır. Trend AzTI telekanalına istinadən bildirir ki, bu barədə maliyyə naziri Əvəz Ələkbərov deyib. O, bəyan edib ki, gələcəkdə AR DNF-in dövlət büdcəsinə ayırdığı məbləğin 100-200 mln. AZN-dək azaldılması mümkündür. 2006-cı ilə olan proqnozlarda Neft fondundan 585 mln. AZN. alınması nəzərdə tutulur.
"Hər şeydən öncə, dövlət büdcəsinə yüksək daxilolmaları təmin etmək lazımdır, sonra tarazlığın təmin edilməsi mümkündür. Hökumətin 2006-cı ildə investisiya xərclərinin artırılması, əmək haqları, digər sosial ödəmələr üzrə planı nəzərə alınaraq AR DNF-dən belə həcmdə transfertin qoyulması labüddür" -deyə Ə.Ələkbərov qeyd edib. Üstəlik dövlət büdcəsinin hesabına 310 mln. avro. dəyərində 52 modul stansiyasının inşası kimi iri investisiya layihələrinin maliyyələşdirilməsinə başlanılıb. Bu vəsaitlərin büdcədən ödənməsi 2007-ci ildə başa çatacaq. Eyni zamanda, gələcək planlara turizmin inkişafı, infrastrukturun bərpa edilməsi də daxildir.
