Azərbaycan hökuməti və Asiya İnkişaf Bankı (AİB) Yevlax - Gəncə və Qazax - Gürcüstan sərhədi qərb-şərq avtomobil magistrallarının son iki sahəsinin yenidən qurulması layihəsinin kredit sazişi üzrə danışıqları başa çatdırıb. Bu barədə Trend ə AİB-in Bakı nümayəndəliyinin rəhbəri Metyu Vestfol bildirib. Bank gələn həftənin əvvəlində sənədi hökumətə təqdim etmək niyyətindədir, bundan sonra kredit sazişi imzalanacaq. M.Vestfol qeyd edib ki, dəqiqləşdirmələr maliyyələşdirmə dərəcəsi ilə bağlı aparılıb, bu, üzən yaxud müəyyən edilmiş olacaq.
Hökumətdə kredit sazişinin imzalanması üçün nəqliyyat naziri Ziya Məmmədova səlahiyyət alınması ilə bağlı hazırlıq gedir.
Hökumət AİB-dən bu layihəyə yolların yenidən qurulması və sərhədyanı servis komponentlərinin maliyyələşdirilməsi üçün iki kredit alacaq. AİB birinci komponentə adi kredit ehtiyatlarından (24 il, 4 illik güzəştli dövr və libor+0,08% illik dərəcə), ikinci isə Asiya inkişaf fondundan 32 il, 8 il güzəştlə və güzəşt dövründə 1%, qalan dövr isə 1,5% dərəcə ilə $3 mln. həcmində güzəştli kredit ayırıb.
AİB-in krediti layihənin ümumi $93,2 mln. dəyərinin 55,8%-ni təşkil edir. Qalan maliyyələşdirmə İslam inkişaf bankının (İİB) ($10,4 mln.), Səudiyyə i nkişaf fondunun ($11 mln.) və Azərbaycan hökumətinin ($19,8 mln.) hesabına təmin ediləcək. Yol nəqliyyatı xidməti Departamenti layihənin yolların yenidən qurulması və institusional gücləndirmə, DGK isə sərhədyanı servis xidmətləri üzrə komponentlərinin icraçısıdır. Layihənin 2010-cu ildə başa çatdırılması gözlənilir.
Qərb-şərq magistralı Azərbaycanda beynəlxalq ticarət və Asiya magistralının bir hissəsi üçün mühüm əhəmiyyət kəsb etməklə Xəzər və Qara dənizi birləşdirən nəqliyyat yoludur.
