Avropa Yenidənqurma və İnkişaf Bankının (AYİB) Direktorlar Şurası aprelin 25-də Azərbaycanın UniBank kommersiya bankı üçün $7,5 mln. məbləğində sindikatlaşdırılmış kredit ayrılması məsələsinə baxacaq. Trend in AYİB-in rəsmi məlumatına istinadən yaydığı xəbərə görə, bu, AYİB tərəfindən Azərbaycan bankı üçün təşkil olunan kiçik və orta sahibkarlığa dəstək üçün ikinci sindikatlaşdırılmış kredit olacaq.
Sənəddə bildirilir ki, sindikatlaşdırılmış kredit iki hissədən ibarət olacaq: bu sindikatlaşmada AYİB-in iştirak payı 3 illik müddətlə $2,5 mln-a qədər olacaq. Kreditin $5 mln-a qədər olan ikinci hissəsi digər banklar tərəfindən maliyyələşdiriləcək. Əgər onların razıldığı olarsa, bu müddət daha bir il müddətinə uzadıla bilər.
Məlumatda bildirilir ki, layihə yerli özəl müəssisələrin orta müddətli maliyyələşdirilməsinin uzadılması üçün bankın beynəlxalq kapital bazarına çıxışını təşkil edəcək.
Layihə maliyyənin yeni mənbələrinin səfərbər edilməsində əhəmiyyətli rol oynayaraq Azərbaycanın maliyyə bazarlarına yeni beynəlxalq investisiya mənbələri gətirir. Bu layihənin maliyyə vasitəçiliyi təşkil edərək özəl sektorda Azərbaycan şirkətlərinin inkişafının güclənməsinə təsir edəcək.
AYİB-in birinci sindikatlaşdırılmış krediti UniBank-la 2005-ci il aprelin 8-də $5 mln. dollar məbləğində 3 illik müddətə bağlanıb. Bu kredit xəttindən $1,5 mln AYİB tərəfindən ayrılıb. Sindikatlaşdırmada yerdə qalan $3,5 mln-u ayıran Austrian Creditanstalt, Anglo-Romanian Bank-ı iştirak edib.