Mayın 18-də Bakıda "Genişlənən Avropa kontekstində Avrasiya nəqliyyat əlaqələri" adlı beynəlxalq konfrans keçiriləcək. Trend in verdiyi məlumata görə, bu barədə jurnalistlərə Azərbaycan Nəqliyyat Nazirliyinin inkişaf və elmi-texniki siyasət şöbəsinin rəisi Elnur Ömərov məlumat verib.
Beynəlxalq konfrans Nəqliyyat Nazirliyi tərəfindən təşkil olunub. Konfransda nəqliyyat və logistika sahəsində fəaliyyət göstərən dövlət və kommersiya şirkətlərinin 200-ə yaxın nümayəndəsi iştirak edəcək.
Tədbirdə aşağıdakı məsələlərə toxunulacaq: Azərbaycan iqtisadiyyatında nəqliyyatın rolu, nəqliyyat sektorunun inkişafı strategiyasının əsas istiqamətləri, regionda beynəlxalq daşınmaların inkişafı perspektivləri, Şimal-Cənub və Qərb-Şərq beynəlxalq dəhlizlərini birləşdirən yerüstü nəqliyyat qovşaqlarının əhəmiyyəti, beynəlxalq nəqliyyat məsələlərində təhlükəsizlik məsələləri, nəqliyyatda təhlükəsizliyin təminatı, nəqliyyat infrastrukturlarının rekonstruksiyası və nəqliyyat vasitələri parkının müasirləşməsi, yeni texnologiyaların və innovasiya proqramlarının tətbiqi.