Azərbaycan İpoteka Fondu (AİF) Beynəlxalq Maliyyə Korporasiyası və İsveçrəinin İqtisadi Məsələlər üzrə Dövlət Katibliyi (Seco) ilə ipoteka kreditləşdirməsi sisteminin inkişafı üçün texniki yardım haqqında ilkin danışıqlara başlayıb. Bu barədə Trend ə fondun icraçı direktoru Faiq Məmmədov bildirib.
Onun sözlərinə görə, Dünya Bankı və Azərbaycan hökumətilə bu istiqamətdə iş aparılır, maliyyə sektorunun təkmilləşdirilməsi layihəsi hazırlanır. "Biz ümid edirik ki, bu layihəyə ipoteka kreditləşdirilməsi və ümumilikdə ipoteka institutları və infrastrukturunun inkişafı üzrə komponent daxil ediləcək" - deyə F.Məmmədov vurğulayıb.
ABŞ-ın Beynəlxalq İnkişaf Agentliyi (USAID) tərəfindən maliyyələşdirilən ACDI IOCA beynəlxalq təşkilatı ilə sərfəli əməkdaşlıq haqqında artıq memorandum imzalanıb.
Bu gün ipoteka kreditləşdirməsi sistemində AİF-nin 15 bankından 10-u işə cəlb olunub. Fondun rəhbərinin dediklərinə görə, onların siyahısı daha da genişləndiriləcək.