Azərbaycan Milli Bankının (AMB) məlumatlarına görə, mayın 1-dəki vəziyyətə görə Azərbaycan banklarının depozit bazası 13,7% artaraq, 1495,5 milyon manat təşkil edib. AMB-dən Trend ə verilən xəbərə görə, bank depozitlərinin, hüquqi və fiziki şəxslərin qoyuluşlarının 2005-ci ilin analoji dövrü ilə müqayisədə ümumi həcmi 34,9% artıb.
İl ərzində milli valyuta ilə depozit və qoyuluşların xüsusi çəkisi 36,4%-dən 42,7%-ə qədər artıb və nəticədə 638,9 milyon manat təşkil edib. Banklara xarici valyutada 856,7 milyon manat cəlb olunub.
Mayın 1-dəki vəziyyətə görə fiziki şəxslərin vəsait qoyuluşları 35% artaraq, 568,4 milyon manat təşkil edib. Xüsusi çəkisi 62% olan hüquqi şəxslərin depozitləri ilin əvvəlindən 12,9 % artaraq, 927,2 milyon manat təşkil edib.
Milli valyutanın məzənnəsinin möhkəmlənməsi ilə əlaqədar il ərzində manat qoyuluşları 2,15 dəfə, 2006-cı ilin əvvəlindən isə 35,3% artıb, xarici valyuta ilə vəsait qoyuluşları isə, müvafiq olaraq, 27,4 % və 12,4 % artıb. Dörd ay ərzində hüquqi şəxslərin manatla qoyulan depozitlərinin həcmi 33,8% artıb, xarici valyuta depozitləri isə 9% azalıb.