Dövlət Gömrük Komitəsi idxal mallar üzrə dördsəviyyəli gömrük tarifləri sisteminə keçidlə bağlı təklifləri Nazirlər Kabinetinə təqdim edib. Bu barədə Trend ə Dövlət Gömrük Komitəsinin Maliyyə-Tarif və Valyuta Nizamilanması üzrə Baş İdarəsinin rəhbəri Mirqasım Vahabov bildirib.
2001-ci ildən bu günə kimi respublikada 0%, 0,5%, 1%, 3%, 5% 10% və 15% dərəcələr tətbiq olunur. M.Vahabovun sözlərinə görə, təsnifatın dəyişdirilməsi nəticəsində yalnız 0, 5, 10 və 15% dərəcələri qalacaq.
"Nazirlik və idarələrin rəyi məlum olduqdan sonra təkliflərə təkrarən baxılacaq və Nazirlər Kabinetində müzakirə olunacaq. Bu məsələ ciddi təhlil tələb edir, çünki hazırda yerli istehsal inkişaf edir və ölkənin idxaldan asılılığı azalır. Bununla əlaqədar biz rəqabəti qorumalı və milli mallara üstünlük verməliyik. Gömrük tariflərinə təkrar baxıldıqdan sonra bu məsələlərə xüsusi diqqət ayrılacaq" - deyə M.Vahabov bildirib.
