Büdcənin valyuta daxilolmalarının Azərbaycan Dövlət Neft Fonduna (ARDNF) verilməsi bu qərarın qanuni qaydada rəsmiləşdirilməsindən sonra həyata keçirilə bilər. Bu barədə Trend ə Nazirlər Kabinetindən xəbər veriblər.
5 ay ərzində dövlət büdcəsinə 262,1 mln. manat həcmində valyuta daxil olub. Bu vəsaitin bir hissəsi büdcə ehtiyaclarının ödənilməsi tələb olunduqda konvertasiya oluna, qalan hissəsi isə ARDNF-da toplana bilər. Hökumətdən bildiriblər ki, bununla əlaqədar artıq ümumi razılıq əldə olunub, lakin məsələnin qanunverici tərəfi qalıb. ARDNF artıq Maliyyə Nazirliyi ilə portfel meyarlarınını razılaşdırır. Həmin portfel fonda xüsusilə fondun valyuta vəsaitlərinin toplanması üçün yaradılacaq. Portfel təxminən $200-300 mln. həcmində formalaşdırılacaq.
Həmin portfel fondun aktivlərinə daxil edilməyəcək. ARDNF büdcə vəsaitlərini qüsamüddətli alətlərdə yerləşdirməyi planlaşdırır, çünki onlar il ərzində lazım ola bilər.
2005-ci ildə valyuta daxilolmalarının konvertasiyası nəticəsində itki 16,7 mlrd. köhnə manat təşkil edib. Buna görə ölkə rəhbərliyi həmin vəsaitləri xarici valyutada göstərməyi qərara alıb. İtkinin maksimal dərəcədə azaldılması üçün həmin vəsaitləri qısa müddətə xarici banklarda hətta aşağı dərəcələrlə yerləşdirmək planlaşdırılıb.