Azərbaycanın kənd təsərrüfatının kreditləşdirmə və inkişaf proqramının ikinci faza layihəsinin (ADCP-2) maliyyələşdirilməsi üçün iyunun 29-da Dünya bankının direktorlar şurası tərəfindən təsdiq olunmuş kredit üzrə saziş sentyabr ayında imzalana bilər. Trend in verdiyi xəbərə görə, bu barədə Dünya bankının Bakı nümayəndəliyindəki layihə kuratoru Rufiz Çıraqzadə bildirib.
Gələn həftə Dünya bankı Azərbaycan hökümətinə bu kredit üzrə sənədlər paketi təqdim edəcək. R.Çıraqzadənin qeyd etdiyi kimi, layihə üzrə işlər 2007-ci ilin əvvəlində başlamalı və 2011-ci ilin mart ayına qədər davam edəcək.
Dünya bankı layihəyə 29,2 milyon ABŞ dolları qoyub. Onların 20,5 milyon ABŞ dolları beynəlxalq inkişaf assosiasiyasının standart şərtləri ilə - 0,75% faiz dərəcəsi ilə 35 il müddətinə (ilk 10 il güzəştli) və 8,7 milyon ABŞ dolları BİA-nın sərt şərtləri ilə - eyni müddətə 3% faiz dərəcəsi ilə verilib. Bu layihədə hökümətin payı 13 milyon ABŞ dolları təşkil edəcək.
Layihə fermerlərin iki istiqamət üzrə - kredit ittifaqları və banklar, lizinq şirkətləri vasitəsilə kreditləşdirilməsini nəzərdə tutur. Kredit ittifaqları vasitəsilə kreditləşdirmə üçün BİA-nın standart şərtləri ilə 8,5 milyon ABŞ dolları və layihənin birinci mərhələsi zamanı yaradılmış fonddan 9,6 milyon ABŞ dolları ayrılacaq. İkinci xətt üzrə BİA-nın sərt şərtləri ilə ayrılmış vəsaitlərdən və hökümətin verdiyi vəsaitlərdən 7 milyon ABŞ dolları istifadə olunacaq.
