Ziya Məmmədov: "Gürcüstan Poti və Batumi limanları istiqamətində marşrutdan ehtiyatlanır"
"Gürcüstan ehtiyat edir ki, Qars - Axalkalaki - Tiflis- Bakı marşrutu üzrə dəmiryolunun açılmasından sonra hazırda Gürcüstanın Qara dənizdəki Poti və Batumi limanlarına nəql edilən yüklərin böyük hissəsi bu dəhlizdən keçəcək. Bu barədə Trend ə Azərbaycanın nəqliyyat naziri Ziya Məmmədov bildirib.
Ancaq Azərbaycan tərəfinin fikrincə, bu marşrutlarla müxtəlif xarakterli yüklər göndərilir. Hazırda Poti və Batumiyə əsasən neft və neft məhsulları nəql edilir. Qars - Axalkalaki - Tiflis- Bakı marşrutu ilə isə əsasən quru yüklər daşınacaq. Artıq Gürcüstan və Qazaxıstan bu nəqliyyat dəhlizi ilə nəqli təmin edəcək protokol imzalayıb", - deyə Z.Məmmədov qeyd edib.
Gürcüstan tərəfi hesab edir ki, layihənin Türkiyə şirkətinin hazırladığı texniki-iqtisadi əsaslandırılmasında bu ölkənin dəmir yollarının reabilitasiyası öz əksini tapmayıb. Hazırda ölkələrin işçi qrupları Tiflisdə bu məsələni müzakirə edir. Müzakirələrin nəticələri iyulun 27-də Qazaxıstanda toplaşacaq nəqliyyat nazirlərinə təqdim olunacaq.
Qars-Axalkalaki-Tiflis-Bakı dəmiryol nəqliyyat dəhlizinin yaradılması layihəsinə 98 km uzunluğunda Qars-Axalkalaki dəmiryol qolunun inşası da daxildir. Bunun 68 km-i Türkiyə, 30 km-i isə Gürcüstan ərazisinin payına düşür. Bundan başqa yolun Axalkalaki-Tiflis hissəsində də müəyyən yenidənqurma işləri aparmaq lazımdır. Layihənin orta dəyəri $400 mln təşkil edir.
